Dit was die tweede naweek waar ons by die huis kom en die werk staan en wag vir ons. In plaas van afpak en ontspan begin ons werk prioritiseer vir Saterdag oggend. Shawn is met verlof vir twee weke en ons moet inspring en die kritiekste werk van die week op 'n Saterdag in pas.
Saterdag oggend trek ek die slaapkamer gordyne oop om die
boord in ‘n landskap van laat somer te sien staan, waar die vorige nag se reën koel klam kolle tussen die bome gelaat het.
Met die lug grys en wolke wat duidelik nog reën bui beloftes inhou,
besef ons dat dit genade gaan neem om alles gedoen te kry in die tuin.
Die bome in die boord staan verveeld rond en wag vir herfs.
Met die meeste vrugte wat al gepluk is, is hul werk klaar vir die somer. Daar is
gerugte van herfs in die blare wat nie meer hul diep somergroen is nie.
Die huis is koel van die nag se reën wat klam op die plante
blink. In die stil kombuis met Engelse ontbyt tee en gemmer marmalade op
roosterbrood luister ons waar die voëls in die bome gesels. Met skerp kort
twiets van die Kaapse witogies tot die somber koer van die Tortelduiwe , ‘n twee-dood, twee-dood van die Laksman in
die groente tuin en die rol fluit van die Tiptol paar in die kweperlaning.
Die Natalse boslelies is in volle blom en hul soet eksotiese
reuk kompeteer met die heuning soet reuk van die Vioolhout blomme. Die bye se
bedrywige versameling van nektar in die Vioolhout laat die blommetjies neer
reën op die ou skoolkar onder die boom.
Ons dag verdwyn in gras sny en ander tuin take in 'n tuin
wat duidelik einde se kant toe staan met die somer seisoen. Daar is tekens dat
die herfs by die hek staan en wag. Die vallei ruik na druiwe wat geoes word en
die mos-suur strepe lê op die teerpaaie wat lei na die verskillende wynkelders.
Ongelooflik om te besef dat herfs al om die draai is. Pragtige pos soos gewoonlik. Dankie.
ReplyDelete